Kasusastraan Sunda

SAJAK RINU KEMBANG

Dina Wanci Harita
Aya nu datang nganteurkeun kembang
Campaka bodas ti gunung guntur
Nu lentik kacida disuka
Disempen dina lalanang jagat
Nu boga harepan dina wanci jaga

Dina Wanci Harita
Aya nu datang nganteurkeun kembang
Eros nu euceuy ti Gunung Parahu
Nu hese ngiceupkeun soca
Lalanang jagat na sawangan
harepan dina wanci jaga

Dina Wanci Harita
Aya nu datang nganteurkeun kembang
Lokatmala nu endah ti Gunung Gede
Nu nande ka badan hate
Lalanang jagat kudu milih hiji

Jadi pangantian dina wanci jaga

KAHIRUPAN

Ayeuna Kuring aya
Milihan waktu pikeun hirup
Milih lengkah anu pasti
Nu naker loba kahese
Dina jalan kahirupan
Aya legok aya datar
Aya lempeng aya pangkolan

Dina nyanghareupan hiji susukan
Kuring meuntas walungan tarik cai na
Pikeun ninggalkeun cai kiruh
Kagorengan wanci kamari
Ngahontal mangsa nu datang
Muntang kana pucuk eurih
Nu inggis tisoledat
Kabawa caah lamunan nafsu

Nyanghareupan hiji gunung
Jangkungna kawanti-wanti
Numpukna ibarat dosa
Maksa kuring leumpang
Dina Lamping kagorengan
Amisna kalangkang dunya
Nu pinuh kapalsuan
Nun Gusti tungtun kuring
Dina Jalan nu lempeng

-ARN 20-11-13-

KACAPI

Kacapi,

Lain kaca dina pipi

Lamun ngaca kana pipi

Tinangtu moal kaciri

Kacapi,

Lain kaca dina impi

Lamun ngaca kana impi

Tinangtu moal pasini

Kacapi,

Harti kecap kudu nepi

Lamun kecapna nepi

Tinangtu bakal kaharti

Kacapi,

Kudu ngaca kana diri

Lamun ngaca kana diri

Tinangtu bakal islami

Kacapi,

Cisoca kapeurih ati

Lamun aya kapeurih ati

Gancang geura susuci

Lamun urang geus susuci

Prak geura nepungan Illahi

SAJAK KANGGO BEURIT

Geus teu hayang mulang

Geus teu hayang nenjo

Geus teu hayang ngadenge

Geus teu hayang nincak

Geus teu hayang nyabak

Geus teu hayang ngambeu

Geus teu hayang dibawa

Geus teu hayang diatur 

Geus teu hayang nyicingan

Geus teu hayang nyaho

Kaayaan lemah kuring 

Nu pinuh ku kanyaah

Kana eusi pesak

Ngahakan harta rahayat

Bangsat-bangsat nu nyamuni

Dina balkon-balkon

Karajaan nagri kuring

Sunda Kilen !!!!!!!!!

SAJAK KANYAAH

Teu kedah Salira nginakeun diri

Lantaran abdi nyipta kamulyan ka salira

Teu kedah saira ngarobih kasampurnan diri

Lantaran Allah nyipta kasampurnan kanggo salira


SAHA ANJEUN

Hiji mangsa
dihiji taman simkuring mendakan
hiji buku nu kacida endah na
pulas katumbiri
matak endah katingal na
ditingal tina sampul na mah
buku na teh kalebet buku catetan.
barang dibuka taya hiji-hiji acan
hurup anu ditulis.
iwal nami anu kagungan buku eta.

GUYUR

Ieu sagara tos garing

ngantosan cai 

Ieu rasa ati kuring

ngantosan  nu ngaheman